Татарстан дулкынында

15 ноябрь. «Татарстан дулкынында».

театр

Әлмәт татар Дәүләт драма театры якын дусларын, әдәбият-сәнгать әһелләрен, ә иң мөһиме – хөрмәт иткән тамашачыларын кунакка җыйды. Төп сәбәп – Әлмәт театры юбилее. Быел аның оешып эшли башлавына – 75 ел булды. Әлмәт театрын бик яратабыз, ләкин бара алмадык дип уфтанырга ашыкмагыз. Бүген игътибарыгызга менә шул тантаналы кичәнең кайбер мизгелләрен тәкъдим итәбез.

13 ноябрь. «Татарстан дулкынында».

IMG_20191112_000700_860

Бүгенге тапшыруны танылган әдип Әмирхан Еникинең сүзләре белән башлап җибәрәсем килә. “Нинди генә җырны алма, ул, барыннан да элек, кеше күңелендә тормышка мәхәббәт уята, кешедә яшисе килү теләген көчәйтә... Шулай булгач, кеше, җыр тыңлаганда, кайгы-хәсрәтне дә менә ничектер татлырак итеп кичерә, еласа, күз яше дә аның ул хәтле ачы булмый һәм барыбер җиңеләеп кала”, – дип яза ул. Әйе милли аһәңнәребезне җиренә җиткереп башкарган, җаны аша үткәреп җырлаган сәнгатькарьләребезне, тыңлаганда, күңелләр тынычланып, ничектер чистарынып, сафланып калгандай була. Бүгенге тапшыруыбызның кунагы – Татарстанның атказанган артисты Айдар Габдиновны да әнә шундый җырчылар рәтенә кертер идем. Көчле, чиста, яңгыравыклы һәм шул ук вакытта колакларны иркәләүче йомшак тавыш иясе ул. “Җырчы рухи дөньясы белән дә бай булырга, күп укырга, бар нәрсәдән хәбардар булып яшәргә тиеш, ­– ди Айдар Габдинов. Быел ул 50 яшьлек юбилеен билгеләп үтте. Ә бу инде үзенә күрә бер тормышыңа иҗатыңа күзәтү ясап, нәтиҗәләр чыгара торган вакыт. Шуңа да бүгенге тапшыруыбызда күп темаларга сөйләштек, җырчыны төрле яклап ачтык.

12 ноябрь. “Татарстан дулкынында”.

ildar-zaripov-006 Россиянең халык рәссамы,Татарстанның атказанган сәнгать эшлеклесе, республикабызның Габдулла Тукай исемендәге Дәүләт премиясе лауреаты Илдар  Зариповның тууына 15 ноябрьдә 80 ел тула. Бүгенге тапшыруыбызда без аның белән моннан 8 ел элек язып алган әңгәмәдән кайбер истәлекләрне  яңартырбыз, иҗатташ дусты Газиз Гобәйдуллин сөйләвендә кайбер хатирәләрне искә төшерербез.

10 ноябрь. “Татарстан дулкынында”.

Акмал Күптән түгел генә Чаллының Муса Җәлил иесендәге Үзәк китапханәсендә шагыйрь прозаик, публицист Нияз Акмалның якты рухын искә алу кичәсе булып үтте. Казаннан бик күп кунаклар – аның каләмдәшләре, җырларын башкаручы җырчылар кайтты, Чаллының әдәбият сөюче халкы килде. Без бүген китапханәдәге шушы залны республика күләмендә киңәйтергә, ягъни кичәдән репортаж тәкъдим итәргә булдык.

8 ноябрь. «Татарстан дулкынында».

marsel_salimzhanov Бүгенге тапшыруыбыз милләтебезнең мәшһүр улы, СССРның халык артисты Марсель Сәлимҗановның якты истәлегенә багышлап әзерләнде. Кичә, 7 нче ноябрьдә аның тууына 85 ел булды. Һәр елдагыча Камал театры артистлары Яңа татар бистәсендәге зиратта Марсель Хәким улы каберенә чәчәкләр салдылар, рухына дога кылдылар. Ә кич белән театрда Марсель Сәлимҗанов исемендәге премия тапшырылды, яшь, өметле режиссер Айдар Җаббаров куелышында Александр Володинның “Санаулы кичләр” спектакле тәкъдим ителде. Театр сәнгатен үстерүгә керткән өлешләре өчен быелгы премия опера җырчысы Гульнора Гатинага, Татарстанның атказанган артисты Фәнис Җиһаншинга һәм язучы “Сәхнә” журналының баш мөхәррире Зиннур Хөснияргә тапшырылды. Бу кичтә зал тулы тамашачы Марсель Сәлимҗановны хәтерләрдә кабат яңартты. Хәер, мәшһүр режиссерның рухы үзе дә шушы залда кебек иде. Марсель Хәким улы әйтеп бетергесез бай мирас калдырып, театр сәнгатебез тарихына үз исемен алтын хәрефләр белән язып, оныттырмаслык итеп китте. Ул киләчәкне кайгыртып яшәде.

7 ноябрь. «Татарстан дулкынында».

IMG_20191031_115638 Бүгенге тапшыруыбызның герое — скрипкачы, композитор, дирижер, Галиәсгар Камал исемендәге татар дәүләт академия театрының музыка бүлеге мөдире Фуат Хәмит улы Әбүбәкеров. Күптән түгел ул үзенең 75 яшен тутырды, ә 13 ноябрьдә Камал театры сәхнәсендә маэстроның юбилей кичәсе узачак. Әңгәмәбез Фуат абыйның тормыш юлына һәм иҗатына багышлана.

6 ноябрь. “Татарстан дулкынында”.

zzhxWEJm830 Күптән түгел бөтен гомерен милләтебезгә багышлаган, танылган шагыйрь Фәнис Яруллинның тормыш иптәше Нурсөя ханым Яруллинаның юбилеена багышланган әдәби-музыкаль кичә булып үтте. “Һәр уңышка ирешкән ир-атның артында зирәк хатын тора”, – дигән әйтем бар. Нурсөя ханым – иренең иҗат белән янып яшәвенә, мәртәбәле дәрәҗәләргә ирешүенә зур өлеш керткән шәхес. Аның язган әсәрләрен иң беренче булып ишетүче, таянычы һәм саклаучы фәрештәсе, рухландырып, көч биреп торган кеше ул. Нурсөя ханым һәрчак сөекле иренә ныклы терәк булып яши. Аларның мәхәббәте, авыр сынауларга бирешмичә, күпләргә үрнәк булып озак еллар дәвам итә. Фәнис Яруллин үзенең киңкырлы иҗаты өчен Татарстанның Габдулла Тукай исемендәге Дәүләт премиясенә, «Татарстанның халык шагыйре» дигән исемгә һәм башка бик күп дәүләт бүләкләренә лаек булды. Аның әсәрләре хәзерге көндә дә яратып укыла. 17wZgi1fgtI «Илһам чишмәм син – Нурсөям!» дип аталган кичәдә Фәнис һәм Нурсөя Яруллиннарның якыннан белгән замандашлары, иҗатташлары, якташлары, әдипләр һәм журналистлар, танылган җырчылар һәм музыкантлар, мәдәният һәм мәгариф эшлеклеләре катнашты. Хөрмәтле, тыңлаучылар хәзер шушы кичәнең иң матур мизгелләрен сезнең игътибарга тәкъдим итәбез.