Татарстан дулкынында

4 ноябрь. “Татарстан дулкынында”.

Вагапов Күптән түгел Казанда Рәшит Ваһапов исемендәге Халыкара татар җыры фестиваленең  Гала-концерты узды. Бүген 11 сәгать 10 минутта сез кичәнең берникадәр кыскартылган беренче өлешен ишеттегез. Хәзер концертның дәвамын тыңлый аласыз.

2 ноябрь. «Татарстан дулкынында».

“Иҗат кешеләрен, гомумән, эш кешесен, өч төрле язмыш көтә, дигәннәр акыллылар. Берәүләрнең, үзләре исән чакта ук, эшләре үлә. Икенчеләрнең эше дә үзе белән үлә!.. Өченчеләрнең исә, үзләре үлсә дә, эшләре кала, хезмәтләре яши, чәчәк ата.” Татарстанның халык язучысы Аяз Гыйләҗев шулай дигән. Әйтерсең лә Аяз ага бу сүзләрне безгә васыять итеп, үз иҗатына карата да әйткән. Быел күренекле язучының тууына 90 ел. Аяз Гилязов Безгә сөенечле хәбәр килеп иреште ноябрьнең 5сеннән 11енә кадәр башкалабыз Казанда танылган язучы һәм драматург Аяз Гыйләҗев спектакльләре декадасы уза. Бу көннәрдә Казан, Әлмәт, Яр Чаллы, Әтнә, Түбән Кама һәм Хакасс театрлары үз спектакльләрен тәкъдим итәчәк. Бүгенге тапшыруыбыз әлеге мөһим вакыйгага багышлана. Декада башланырга берничә көн кала язучының тормыш иптәше Нәкыя Гыйләҗева, аның улы, шулай ук танылган драматург Мансур Гыйләҗев, филология фәннәре кандидаты Миләүшә Хәбетдинова, театр тәнкыйтьчесе, Камал театрының әдәби бүлек мөдире Нияз Игъламов катнашында матбугат очрашуы үтте. Анда катнашучылар журналистларга Аяз Гыйләҗев исемен таныту буенча башкарылган эшләр һәм үтәчәк декада турында сөйләделәр. Күптән көтелгән вакыйганың төп үзенчәлекләрен оештыручыларның үзләреннән ишетү дөресрәк булыр.

1 ноябрь. “Татарстан дулкынында”.

Казань 2018 культура Бүген тапшыруда академик, безнең бик күп мәсьәләләрдәге киңәшчебез Индус ага Таһиров катнаша. Дөресен әйтик, аның янына өенә баруыбыз фәкать бер генә максат белән – Татарстан Конституциясе көне уңаеннан әңгәмә әзерләү уе белән иде. Ләкин ачыклыйсы сорауларыбыз шулкадәр күп жыелган булып чыкты, сөйләшү барышында әлләникадәр темаларга кереп кителде һәм тапшыруыбыз үзеннән-үзе «Кызыклы очрашулар кунакханәсе» сәхифәсе рәвешен алды.

31 октябрь. “Татарстан дулкынында”.

20181031_130556 Гадәттә тапшыруларыбызга сәнгать әһелләре, әдәбият вәкилләрен чакырсак, бүгенге әңгәмәбез берникадәр үзгәрәк – табиб тормышы һәм сәламәтлек хакында барыр. Хәер, ак чәчәкләргә тиңләрдәй шәфкать ияләребезнең хезмәте үзе бер сәнгать түгелмени?! Кайбер табиблар турында: “Даруы – дәва, сүзе йөрәккә май диләр”… Авыруларны бөтен күңел җылыңны биреп дәвалаганда гына яхшы нәтиҗәләргә ирешергә мөмкиндер. Бүгенге кунагыбыз да әнә шундый ак күңелле табибларыбызның берсе, бөтен гомерен ревматик чирләрне дәвалауга багышлаган ханым, Татарстанның атказанган табибы, Казан шәһәренең ревмотология үзәге җитәкчесе – Равия Гаяз кызы Мухина. Равия ханым буыннары сызлап интеккән авыруларны җыр-биюләр ярдәмендә дә дәвалый. Моннан тыш, аның үз вакытында Габдрахман Әпсәләмовның “Ак чәчәкләр” романында язылган кешеләр белән дә бергә эшләве, аралашып яшәве дә мәгълүм. Кыскасы, бүгенге тапшырубыз табиб язмышы һәм сәламәтлек хакында булачак.

30 октябрь. “Татарстан дулкынында”.

библ книг Татарстанның Әлмәт каласында  Татарстан язучылар берлеге идарәсе һәм “Татнефть” ачык акционерлык җәмгыяте тарафыннан игьлан ителгән Саҗидә Сөләйманова исемендәге республика әдәби премиясе лауреатларын һәм стипендиатларын бүләкләү тантанасы узды. Көн  дәвамында  төрле мәдәни чаралар да үтте.  Бүген без әлеге чаралар турында сөйләшербез.

28 октябрь. “Татарстан дулкынында”.

Ильясов Татарстанның халык артисты Рафаэль Ильясов быел Рәшит Ваһапов исемендәге мәртәбәле премиягә лаек булды. Бу Татарстан радиосы коллективы өчен дә, аны тыңлаучылар өчен дә икеләтә сөенеч, чөнк Рафаэль абыебыз нәкъ менә безнең радио ветераны, 40 елдан артык музыкаль тапшырулар редакторы булып эшләгән коллегабыз.  Әле дә ул безнең эшләребез белән кызыксынып яши, киңәшләре белән булышып тора. Менә шушы олпат кеше, татар милли музыка сәнгатенең бер күренеклесе Рафаэль Ильясов бүген безнең тапшыруыбызда “Кызыклы очрашулар кунакханәсе” сәхифәсендә кунакта.